नाईँ नभन्नू ल–३ शीर्ष गीत रिलिज (भिडियो सहित)

काठमाडौँ । "नाईँ नभन्नू ल-३" को शीर्ष गीत सार्वजनिक रूपमा प्रस्तुत  गरिएको छ । बुधवार साँझ सार्वजनिक भएको शीर्ष गीतमा तीन  जोडीलाई एक साथ देख्न सकिन्छ ।  सानै उमेरमा ख्याति कमाएका वाल कलाकार अनुभव रेग्मी आफ्नै उमेरकी नयाँ कलाकार सफलता भट्टराईका साथ देखिएका छन् भने नेपाली चलचित्रका स्थापित नायक-नायिका आर्यन सिग्देल र प्रियंका कार्की सहित कुनै समयकी निकै चलेकी नायिका संचिता लुइँटेललाई नव-स्थापित नायक सुरजसिंह ठकुरीलाई प्रेम दृश्यमा  देख्न सकिन्छ ।

 

वर्ष २०७१को अन्त्य चैत्र २७ देखि प्रदर्शन हुने यो अंक पनि पारिवारिक कथानक  श्रेणीको चलचित्र हो जसलाई निर्देशक विकास आचार्यका सहायक मुस्कान ढकालले निर्देशन गरेका हुन । गत वर्ष ५ करोड ग्रस कारोबार गर्दै सर्वोच्च व्यावसायिक मापदण्ड स्थापना गरेको 'नाईँ नभन्नू ल-२' को  यो तेस्रो अंकमा पनि वसन्त सापकोटाको सङ्गीत छ । उत्कृष्ट गीत सङ्गीत बनाउने निर्देशक  भनेर समेत चिनिने विकास आचार्यको समूहले यस पटक छायांकनको स्तरमा समेत निकै ध्यान दिदै गीत तयार गरेको देखिन्छ।